11-សីហា-2020 - ម៉ោង 10:36:AM
តាកែវ៖ មន្រ្តីជាន់ខ្ពស់ក្រសួងសង្គម អតីតយុទ្ធជន និងយុវនីតសម្បទា បានធ្វើការអំពាវនាវទៅដល់មាតា បិតាឬអាណាព្យាបាលទាំងអស់ សូមកុំប្រើអំពើហឹង្សាទៅលើកុមារ ត្រូវបង្វែរអំពើហឹង្សានេះទៅជាពាក្យ អប់ឬំទូន្មានស្តីប្រដៅកុមារក្នុងពេលដែលកុមារប្រព្រឹត្តខុសអ្វីមួយ ព្រោះការប្រើហឹង្សាទៅលើកូនដែលជាកុមារ ជាអំពើខុសពីច្បាប់ ។
ថ្លែងនៅចំពោះមុខមន្រ្តីមូលដ្ឋានថ្នាក់ស្រុកឃុំសង្កាត់ ក្នុងឪកាសបើកសិក្ខាសាលា ស្ដីពីការពង្រឹងយន្តការអនុវត្តប្រព័ន្ធកិច្ចការពារ កុមារ និងប្រមូលទិន្ន័យកុមាររងគ្រោះ និងងាយរងគ្រោះ ដើម្បីរៀបចំសេវាមូលដ្ឋានចាំបាច់ក្នុងការគាំទ្រ កុមាររងគ្រោះ និងងាយរងគ្រោះ ហៅកាត់ OVC នៅក្នុងសហគមន៍ ដែលរៀបចំឡើងនៅសាលប្រជុំមន្ទីរសង្គមកិច្ចខេត្ត នាព្រឹកថ្ងៃចន្ទ ទី១០ ខែសីហា ឆ្នាំ២០២០ ឯកឧត្តម នឹម ថូត រដ្ឋលេខាធិការក្រសួងសង្គមកិច្ច អតីយុទ្ធជន និងយុវនីតិសម្បទា បានមានប្រសាសន៍បន្តទៀតថា ការបង្ហាញកាយវិការឬការប្រើអំពើហឹង្សាទៅលើកុមារ វាជាគំរូមិនល្អសម្រាប់កុមារឬក៏កុមារអាចយកគំរូនេះទៅប្រព្រឹត្តជាមួយមិត្តភ័ក្រ្តក៏ថាបាន ពិសេសគឺវាខុសនឹងច្បាប់នៅពេលដែលឪពុកម្តាយឬអាណាព្យាបាលបានវាយដុំ ប្រើហឹង្សាទៅលើកុមារ ដូច្នោះសូមបញ្ឈប់អំពើហឹង្សានេះសម្រាប់កុមារ ។
ឯកឧត្តមរដ្ឋលេធិការ បន្ថែមទៀតថា កុមារគឺជាទំពាងស្នងឬស្សីដែលទាមទារអោយយើងម្នាក់ៗ ពិសេសគឺឪពុកម្តាយឬអាណាព្យាបាល ថ្នាក់ថ្នម យកចិត្តទុកដាក់ និងធានាអំពីសិទ្ធិរបស់កុមារ ដែលអាចអោយកុមារទាំងនោះ បានសិក្សារៀនសូត្រ បានស្លៀកពាក់ ញុំអាហារជាដើម ម្យ៉ាងវិញទៀត ប្រសិនបើយើងអប់រំទូន្មានកុមារពីតូច អោយក្លាយជាមនុស្សល្អ មានលីសធម៌ នោះអនាគត់របស់កុមារ នឹងក្លាយជាធនធានមនុស្ស សម្រាប់សង្គមជាតិរបស់យើង ជាក់ជាពុំខាន ។
ឯកឧត្តម នឹម ថូត នឹងសង្ឃឹមមុតមាំថា កុមារ ពិសេសកុមារកំព្រា កុមាររងគ្រោះនឹងងាយរងគ្រោះ កុមារស្ថិតក្នុងគ្រួសារក្រីក្រទាំងអស់នឹងត្រូវបានថែរក្សា ការពារ យកចិត្តទុកដាក់ពីគ្រប់មជ្ឈដ្ឋានទាំងអស់ ហើយរួមគ្នាលើកកម្ពស់សិទ្ធិកុមារអោយកាន់តែខ្លាំងខ្លាថែមទៀត ព្រោះកុមារជាមនុស្សដែលត្រូវបានការថែទាំ មើលថែរក្សា និងទំនុកបម្រុងដល់ពួកគេទាំងនេះអោយបានល្អ ។
ឯកឧត្តម នឹម ថូត ក៏បានបញ្ជាក់ផងដែរអំពីគោលបំណងសិក្ខាសាលានេះ គឺដើម្បីពង្រឹងយន្តការ ប្រព័ន្ធកិច្ចការពារកុមារនៅថ្នាក់ក្រោមជាតិ ដល់មន្រ្តីអាជ្ញាធរពាក់ព័ន្ធ ក្នុងការកំណត់ទ័ន្ន័យកុមាររងគ្រោះ និងកុមារងាយរងគ្រោះ ដើម្បីកំណត់អត្តសញ្ញាណ ប៉ាន់ប្រមាណពីតម្រូវការសេវាដែលជាតម្រូវការចាំបាច់ដល់កុមារ និងគ្រួសាររងគ្រោះ ងាយរងគ្រោះ ក្នុងការរៀបចំផែនការ ស្វែងរកការគាំទ្រ កៀរគរ ធនធានជួយដល់ពួកគេនៅតាមសហគមន៍ អោយកាន់តែប្រសើរឡើងថែមទៀត ។
បើយោងតាមការបញ្ជាក់ពី លោក ប៊ុន បូរិន្ទ ប្រធានមន្ទីរសង្គម បានឲ្យដឹងថា នៅទូទាំងខេត្តតាកែវ មានកុមារចំនួន ៤៥៣៤នាក់ ស្រី ២៥០៦នាក់ ដែលរងគ្រោះ និងងាយគ្រោះដោយសារ ភាពក្រីក្រ ការបែកបាក់គ្រួសារ ការសេពគ្រឿង ស្រវឹង ការលេងល្បែងស៊ីសង អំពើហិង្សាក្នុងគ្រួសារ ការធ្វើចំណាកស្រុក ការបោះបង់ចោលការសិក្សា ការរស់នៅជាមួយ អ្នកដែលពុំមែនជាឪពុកម្ដាយបង្កើត និងការរងផលប៉ះពាល់ដោយសារជម្ងឺអេដស៍ គឺជាបរិមាណគួរឲ្យកត់សម្គាល់៕
