11-កក្តដា-2024 - ម៉ោង 07:00:PM
តាកែវ៖ លោក វ៉ី សំណាង អភិបាលខេត្តតាកែវថ្មីបានធ្វើការប្ដេជ្ញាចិត្ត និងដាក់ចេញវិធានការដ៏ម៉ឺងម៉ាត់ដល់សមត្ថកិច្ចពាក់ព័ន្ធ ធ្វើការបង្រ្កាបក្រុមក្មេងទំនើងបងតូចបងធំដែលតែងតែបង្ករភាពអនាធិបតេយ្យនៅក្នុងខេត្ត និងតាមមូលដ្ឋាននានាចេញអោយអស់ ដើម្បីធានាបាននូវសុខសុវត្ថិភាពជូនប្រជាពលរដ្ឋ។
ថ្លែងនៅក្នុងឱកាសអញ្ជើញចូលរួមក្នុងកិច្ចប្រជុំសាមញ្ញលើកទី២ អាណត្តិទី៤ របស់ក្រុមប្រឹក្សាខេត្តតាកែវ ដែលបានរៀបចំធ្វើឡើងនៅសាលប្រជុំរដ្ឋបាលសាលាខេត្ត នាព្រឹកថ្ងៃទី១១ ខែកក្កដា ឆ្នាំ២០២៤ លោក វ៉ី សំណាង អភិបាលខេត្តតាកែវបានមានប្រសាសន៍ថាកន្លងមកនេះសង្កេតឃើញថាមានក្រុមក្មេងទំនើងតែងតែងបង្ករភាពអនាធិបតេយ្យ នៅតាមទីប្រជុំជន សួនច្បារ និងទីសាធារណៈ ដេញវាយកាប់ចាក់គ្នាជារឿយៗ ធ្វើអោយប្រជាពលរដ្ឋរស់នៅមានភាពភ័យខ្លាច ដូច្នេះដើម្បីលុបបំបាត់ក្រុមក្មេងទំនើងទាំងអស់នេះ ក្នុងនាមខ្ញុំជាគណអភិបាលខេត្ត ណែនាំដល់សមត្ថកិច្ចពាក់ព័ន្ធគ្រប់លំដាប់ថ្នាក់ទាំងអស់ ត្រូវតាមដានរាល់សកម្មភាពអុកឡុកផ្សេងៗ របស់ក្រុមក្មេងទំនើងទាំងអស់នោះ និងកំណត់មុខសញ្ញាទីតាំងហើយធ្វើការចុះបង្ក្រាបអោយបានទាន់ពេលវេលា ក្នុងនោះដែរក៏ត្រូវយកចិត្តទុកដាក់លើបញ្ហាគ្រឿងញៀន បង្រ្កាប និងទប់ស្កាត់រាល់ការជួញដូរ និងប្រើប្រាស់គ្រឿងញៀនខុសច្បាប់គ្រប់ប្រភេទ ព្រោះគ្រឿងញៀនវាបង្ករអោយមានអំពើហឹង្សា និងក្រុមក្មេងទំនើងនេះកើតឡើង។
ក្នុងឱកាសនេះដែរ លោកអភិបាលខេត្តតាកែវ ក៏បានអំពាវនាវដល់ថ្នាក់ដឹកនាំ មន្រ្តីរាជការ ព្រះសង្ឃ ប្រជាពលរដ្ឋទូទាំងខេត្តតាកែវ បន្តគាំទ្រគម្រោងព្រែកជីកហ្វូណនតេជោទាំងអស់គ្នាបន្តទៀត គម្រោងមួយនេះនិងផ្ដល់អត្តប្រយោជន៍ជាច្រើនដល់ប្រជាជន និងសង្គមជាតិយើងទៅថ្ងៃអនាគត ហើយនៅថ្ងៃទី០៥ ខែសីហា ឆ្នាំ២០២៤ ខាងមុខនេះ ដែលជាថ្ងៃបើកការដ្ឋានសាងសង់ព្រែកជីកហ្វូណនតេជោ សូមប្រជាពលរដ្ឋចូលរួមវាយស្គរ គោះត្រឡោក ប៉ោតអោយបានអធិកអធម ហើយអ្វីកាន់តែពិសេសទៅទៀតនោះ រដ្ឋបាលខេត្តនិងរៀបចំការប្រគុំតន្រ្តី និងការប្រកួតកីឡាបាល់ទាត់ ដើម្បីបង្ហាញការគាំទ្រ និងអបអរសាទរគម្រោងព្រែកជីកហ្វូណនតេជោបានបើកកាដ្ឋានសាងសង់ជាផ្លូវការ៕
